E to’a sefulu ma le ono (16) tagata ua taofia e leoleo, ma le tele o fuālaau faasāina e tusa lea ma le $6.5 miliona lona tau aofa’i, i se tasi o osofa’iga tele a le auaunaga i faaitu o Rotorua ma Aukilani.
O se tasi o galuega o loo taula’i i le taofia ai o gaioiga faasolitulafono a i latou ua ta’ua o criminal groups.
Ta’ua e le Ta’ita’i Leoleo Asiasi o se leoleo su’esu’e faapitoa foi, Detective Inspector Darrell Pilbrow, le maua ai e leoleo le tele o fale mautotogi (rental homes) ua suia e nei tagata e avea ma nofoaga e totō ma teumalu ai neiee fuālaau faasāina o le maruana.
Faamauina i ripoti a le NZ Herald, mai le osofa’iga na molimauina ai le tumu o fale i laau maruana i tulaga eseese ua iai le ola o le laau, vaaia ai foi le tele o mōlī e faapipii solo i fale ma nisi o mea faigaluega e faaaogā e faaola lausiusi ai le laau.
Māua le molimauina ai e leoleo o metotia ua faatino e ia tagata ina ia ‘aua ne’i maua e nisi ia laau faasāina.
E lē gata i lea na faamauina foi le su’esu’eina ai e leoleo o le ave faagaoi e i latou ua molia nei, o le eaetise ma oo lava i tulaga o le tula’i ai o ni mū ma tauau ina lamatia ai soifua ma ola o tagata o loo nonofo tuaoi.
E to’a sefulu ma le lua (12) ua tula’i i luma o le Faamasinoga Faaitumalo i Rotorua, i moliaga e aofia ai le totōina o laau faasāina o le maruana, cannabis, umia ma le faamoemoe e faatauina atu, ma umiaina o meafaigaluega e faaaogā mo le tōtōina o fuālaau faasāina.
O nisi ua faaalia lo latou manana’o e toe faafo’i atu i lo latou atunuu.
Owes nisi o loo molia ua faailoa lo latou manana’o e tipoti i latou i o latou atunuu.
O loo faaauau pea su’esu’ega a leoleo, ma le tele o tusi faataga poo search warrants e faatino i Aukilani ma Bay of Plenty, ma e iai le talitonuga e ono iai foi nisi e taofia faapagota ma molia ai.
Ua fautuaina foi e le auaunaga o leoleo i latou e onaina ia fale mautotogi ina ia māta’itu lelei fale i ni gaioiga faasolitulafono e pei o le tapunipuni ai o faamalama, o ni masini e seāseā vaai o faaaogā mo fale ma le faaaogā o tupe i le tele o fetuuna’iga (cash payment) ma le suia o vaega i le mita o le eletise.
Puna o Faamatalaga: https://www.nzherald.co.nz/nz/cannabis-bust-16-arrested-as-65m-haul-seized-in-rotorua-auckland-raids/U4I5NWZ6IRATXN6JDCP4PWGWYQ/
