Ua manumalo ni tama’ita’i a’oga se to’atolu mai le Columba College i le faailoga maualuga mai le Otago Science Fair, ina ua latou su’esu’eina vaega o loo maua i le suāvai o le Water of Leith i Dunedin.
O nei tama’ita’i a’oga e i le Vasega 12 poo le Year 12, o Ava Wilson, Zoe MacKenzie ma Emily Berry, na manumalo i le Best-in-Fair Award mo le latou galuega ua faaigoaina, “What Lies Beneath the Leith.”
Na latou su’esu’eina mea o loo faaleagaina ai le vai, e aofia ai otaota poo lapisi o uga ua ta’ape i totonu o le suāvai poo vaega ua ta’ua o microplastics.
Na ta’ua e le faatonu ma le faamasino o lea faaaliga, Dr Steven Sexton, ua faamaonia mai i nei sa’ili’iliga e lē o mamā le suāvai i le tulaga e tatau ona iai.
Na tatala le avanoa i fanau o Vasega 7 aga’i i le Vasega 13 e fia auai i lenei faaaliga o taumafaiga faasaienisi, le Science Fair.
E 255 galuega na faaalia mai i a’oga e 14, ma e tusa ma le 315 tamaiti a’oga na auai.
E tusa ma le 40 faailoga na tauaaoina i vaega eseese o su’esu’ega faasaienisi, e amata mai i anatomy se’ia oo atu i zoology.
O le su’esu’ega a nei fanau a’oga ua faailoa mai ai le tāua o le māta’itūina o le faaleagaina o vai ma le puipuia o ālavai i totonu o taulaga.
Puna o Faamatalaga: https://www.odt.co.nz/news/dunedin/students-look-into-what-lurks-in-the-leith-
