O se tala fiafia le filifilia ai o le tama’ita’i ta’alo lakapi, ia Amarante Sititi, mo le ‘au a le Black Ferns i lenei tausaga 2026.
O lea alo o Samoa e 19 tausaga le matua, ma o se vaega mata’ina o ua mulimulita’i ai lea talavou i tulagāvae o lona tuagane, le alii ta’alo a le All Blacks o Wallace Sititi.
Na filifilia Amarante ina ua mae’a ai le taamilosaga o le Super Rugby Aupiki, e tusa ai foi ma taumafaiga i le ‘au na siamupini o le Blues.
Sa ta’alo Amarante i le tulaga o le blindside flanker i lea taaloga, peita’i ua filifilia nei o ia e le faia’oga o le Black Ferns, Whitney Hansen, e ta’alo i le tulaga o le lock.
O loo aofia o ia i le to’alima o tama’ita’i ua filifilia mo le ulua’i taimi e tausiniō i le lakapi i tulaga faavaomalo (debut).
Ma ua avea ai nei o ia ma sui e 31 ua filifili atu mo le ‘au a le Black Ferns.
Ua ta’ua e Hansen, o Amarante o se tama’ita’i ta’alo i lona tilotilo, o se tasi e mata’ina a na taumafaiga ma o le ala foi lea na ia manatu ai e tatau ona auai i le ‘au.
E valu taaloga faavaomalo o loo totoe a le Black Ferns i lenei tausaga e aofia ai taaloga ma Ausetalia, Aferika i Saute, Farani, Sikotilani ma Egelani.
O le latou ulua’i Test o le a fetaui ai ma Ausetalia i Aukilani i le aso 22 o Aokuso.
Puna o Faamatalaga: https://www.stuff.co.nz/sport/361013392/amarante-sititi-among-five-new-caps-31-player-black-ferns-squad
