Ua lē mafai i le finauga a le loia a le sui faipule o Safata 2 e pei ona tuuina atu ai se talosaga i le faamasinoga, ona taofi le tuuina atu e le itu na faauluina le tagi tau palota, se vaega o ana mau tautō e faamatala atili ai le autū o moliaga e 6 o faiga faaālatua o loo tuua’ia ai le sui faipule le afioga Tuia Fuatogi Pu’a Letoa.
O se vaega o molimau tautō tusitusia a Tologataua Sooalo Sioeli Alofaifo ma Filivaaileo’o Toleafoa mo le itu tagi sa finauina e lē tatau ona faaaogā ona o ni mau faalogo poo hearsay evidence.
Peita’i sa finau le loia a le itu ua faauluina le tagi tau palota ua na o ni mau e faamatala atili ai moliaga o faiga faaālatua faasino i le tuuina atu o le ta’i afeselau tālā i nisi o tagata palota mai le taui tupe e sefulu miliona mo le manuao o loo goto i gataifale o Safata, ae sa umi se tele le taimi sa tatau ai ona tufa lea taui tupe.
Ua talia ai e le faamasinoga le faaaogā o ia mau i le tulaga e pei ona faailoa e le loia a le itu tagi ae o le talia ma le teena o le pitolaau lea a le faamasinoga i le taimi e su’esu’e ai mau i le aotelega o le tagi tau palota.
I le finauga lava a le sui faipule ua talia e le faamasinoga le aveesea o se tasi o vaega o le tagi o loo tatalo ai i le faamasinoga Leleua Suataga Aso ina ia filifilia o ia i le tofi faipule o le itumalo o Safata 2 pe a faamaonia ana moliaga.
Ua faaalia e le faamasinoga o lea tulaga e faasino tonu i se talosaga e toe faitau ai le aofa’iga o palota pe afai e fesiligia e se sui sa tauva se eseesega i le numela o palota na ia maua poo le fesiligia o le tulaga agavaa o ni tagata palota.
O le aso 21 o le masina fou o Setema ua faatulaga e le faamasinoga o le a amata valaau ai molimau o lea tagi tau palota.
