E to’atolu ni alii, ua molia nei i gaioiga taufaasesē, e aofia ai lē sa avea ma faatonu o se tasi o pulega poo council.
Faamauina o ia gaioiga solitulafono na mafai ona o latou maua ai le silia ma le 12 miliona tālā.
Ae i faatauta’iga o lenei faamasinoga, na teena e ia alii o latou moliaga.
Ta’ua i ripoti na faatino e ia tagata e to’atolu o nei faiga taufaasesē aga’i i pulega poo councils a Aukilani ma Kāpiti.
Faamanino mai e le sui o le Serious Fraud Office, poo le SFO, e tofu alii ma moliaga ta’ilua, fesoota’i i le maua o tupe e ala i faiga taufaasesē.
E masalomia e le SFO, o lē sa faigaluega i le council, sa galue i ni galuega tetele mo councils o loo aafia, ae i le taimi lava lea sa ia faatautaia foi se kamupanī inisinia faatasi ma isi alii e to’alua.
O loo tuua’ia na ia faaaogāina lona tulaga i totonu o le council e fesuia’i ma faasesē ai le faagasologa o le filifilia ai o kamupanī e maua konekarate mo ia galuega tetele.
Fai mai le SFO, e tusa ma le 1.7 miliona tālā na maua e le kamupanī mai le Auckland Council i le va o le 2011 ma le 2015.
E $10.5 miliona foi na maua mai le Kāpiti Coast District Council i le va o le 2015 ma le 2024.
Na tula’i uma i latou i le Faamasinoga Faaitumalo i Porirua, lea na o latou teena ai moliaga e faia faasaga ia i latou; ua ta’ua o le a faasolo le faamasinoga e iai ma faatonu poo le jury trial.
O loo taofia mo le taimi nei le faalauiloaina o o latou suafa.
E valaau le faamasinoga i le aso 15 o Setema.
Puna o Faamatalaga: https://www.rnz.co.nz/news/crime-and-justice/1049509/three-men-accused-of-fraudulently-obtaining-12m-from-two-councils
