Ua taunuu i Samoa se aumalaga o sui o le Faalapotopotoga Faavaomalo mo Faiga Faatemokarasi ma Fesoasoani i Ofisa o Faigāpalota e feiloa’i ma sui faipule o le Palemene a Samoa i le autū e faatalanoa ma sa’ili ni o latou finagalo i le faaaogā o fesoota’iga faatekonolosi faaonaponei e palota mai ai o tatou tagatānuu o aumau ma alala i atunuu i fafo.
E pei ona silafia o se tasi lea o suiga sa folafola e le Vaega Faaupufai o loo tu nei i le faatautaia o le malo i faatosina o le palota tele o le 2021, peita’i na mae’a le Paeaiga 17 a le Palemene e le’i faatinoina lea fuafuaga.
O le tatala o le palota mai fafo o tagata Samoa e aunoa ma le tau malaga mai i Samoa e palota ai e lē o lagolagoina e nisi o le atunuu e aofia ai ma le Vaega Faaupufai o loo agaia nei le malo.
Ae o le palota tele ia Aokuso sa tatala ai le lesitala mai fafo o o tatou tagata e agavaa e palota peita’i sa malaga mai i Samoa e faamae’a ai isi aiaiga e pei o le pu’eina o le ata.
O le Aso Lua o le vaiaso nei e amata ai ona faatalanoa sui mamalu o itumalo i le Palemene, ma o se vaega muamua lea o se sa’ili’iliga a le Faalapotopotoga Faavaomalo mo Faiga Faatemokarasi ma Fesoasoani i Ofisa o Faigāpalota o le International Institute for Democracy and Electoral Assistance.
Ua faaalia i se lipoti a le nusipepa o le Sunday Samoan, ua ave e le Ofisa o le Komisi o Faigāpalota, tusi valaaulia o sui faipule uma e faatatau i le malaga mai o sui o lea faalapotopotoga faavaomalo e faatino le latou sa’ili’iliga muamua poo se feasibility study.
