E 12 masina ua nofo vaavaaia ai se alii e 28 tausaga le matua ma ua faasā ona toe tago i le foeuli o se pasi la’upasese e māfua ina ua ioe i moliaga o le avetaavale faatamala na oo ai le maliu i se tama talavou e 16 tausaga le matua.
Ua molia foi lea alii i le aveina o se pasi la’upasese ae o lona laisene avetaavale e lē o faatagaina ai le tago i le foeuli o le pasi, ua na o taavale i le vaega B, poo private vehicles.
O le masina o Me o le tausaga nei a o aveina e Apelu Tauaga se pasi sa aga’i i le malae vaalele i Faleolo ae o lē ua maliu sa malaga mai i se pasi sa aga’i i Apia.
A o aga’i mai i Apia le pasi sa malaga ai lē ua maliu sa ia toe faatū le taavale e fia foi i le fale e aumai se tasi o ana meatotino ua galo.
Na ia sopo’ia le auala mai tua o le pasi sa malaga ai ae so’a ai loa e le pasi sa faafoe e lē ua molia.
O le lipoti a le foma’i na faamaonia ai o le ogaoga o manu’a mai le faalavelave na māfua ai le maliu.
Ua fautuaina malosi lē ua molia a mae’a le 12 masina o loo nofo vaavaia ai, ia alu e toe a’oga ia pasi le defensive driving course.
