Ua saunoa manino le Pelesetene o le SASNOC le faalapotopotoga o taaloga a Samoa i le toe taliu manuia i fanua o le ‘au masii a le atunuu i taaloga talu ai nei a Malo o le Taupulega, e leai se ‘alofaga o le na o le 2 o pine na maua ona sa lava tapena le ‘au a le atunuu.
O lona foi lagona o le faaupuga o le toe oso foi le la e lē lelei, auā e ta’u mai ai e le’i lava tapena.
Na faailoa lea lagona o le Pelesetene o le SASNOC le afioga Tuaopepe Jerry Wallwork ina ua māfuta ane i nisi o tusitala i le mae’a ona feiloa’i ma le Minisita o Taaloga ma Alaga’oa mo le Fiafia o Tagata, le tofa Seuamuli Fasi Toma ma tauaao iai le pine auro ma le pine siliva na maua e Samoa, mo le tuuina atu i le Kapeneta.
O pine na manumalo ai Samoa na maua uma i le taaloga o le siisii u’amea mamafa, ma ua mautinoa o le a maua e le tama’ita’i o Seine Stowers le taui tupe e tusa o le faigafaavae a le malo i le pine auro na manumalo ai.
O taaloga ua mae’a a Malo o le Taupulega sa tausiniō ai Samoa i taaloga e lima e aofia ai faipelega, taaloga afeleti, ‘aau, judo, ma le siisii u’amea mamafa.
