Ua tauaveina nei e le afioga i le tama’ita’i faamasino o le Faamasinoga Maualuga le afioga Leutele Niavā Mata Tuatagaloa le tofiga o le faamasino sinia o lea faamasinoga a le atunuu ina ua mae’a faamaonia e le afioga i le Ao Mamalu o le Malo lea tofiga e pei ona faamaonia mai e le Ofisa Sili o le pulega o le Matāgaluega o Faamasinoga ma le Faafoeina o Matāupu Tau Faamasinoga le susuga Papalii John Taimalelagi Afele.
Ua faamauina ai o le ulua’i tama’ita’i faamasino lea ua na tauaveina le tulaga o le faamasino sinia o le Faamasinoga Sili talu ona aloa’ia lea tofiga ia Novema o le tausaga e 2021 lea na ulua’i tofia iai le afioga Vui Clarence Nelson ua mālōlō litaea mai le tofiga faamasino o lea faamasinoga.
O le afioga Leutele Niava Mata Tuatagaloa na avea ma ulua’i tama’ita’i loia na filifilia e avea ma faamasino o le Faamasinoga Faaitumalo i le tausaga e 2011 ae o ia foi le ulua’i tama’ita’i faamasino na filifilia e avea ma Faamasino o le Faamasinoga Maualuga poo le Faamasinoga Sili a Samoa.
O lona tauaveina ai o le tofiga faamasino sinia o le Faamasinoga Maualuga ua avea ai ma ulua’i tama’ita’i faamasino o le atunuu e filifilia e tauave lea tulaga sinia i le galuega faafaamasino o lea faamasinoga tāua a le atunuu.
Ua 15 nei tausaga o tautua i le malo ma le atunuu i le tofiga faamasino o le faamasinoga a Samoa.
