Ua faatoese nei se tasi o ta’ita’i sinia o le Matāgaluega o Leoleo a Niu Sila ona o le lē manino o le auala na faailoa atu ai i le Komesina o Leoleo, fuafuaga a le ta’ita’i leoleo, Superintendent Rakesh Naidoo i le ono tauva ai mo le vaega faaupufai a le Leipa.
Ua faamālūlū ai Tim Anderson i le Komesina o Leoleo, Richard Chambers, i se sasi aemaise lona tuu atu ai o se faatoesega i le alii leoleo sinia ia Naidoo, ona o le lē sa’o o nisi o faamatalaga na tuuina atu i le aufaasalalau.
Ta’ua i ripoti mai le leitio faavaomalo e faapea, i faamaumauga na tuuina mai e tauala mai i le Official Information Act, na mua’i talanoa atu Rakesh Naidoo ia Tim Anderson i le faai’uga o Me, ma faailoa ai o loo mafaufau e tamo’e i le faigāpalota i lalo o le fu’a a le Leipa.
Na faamauina i lea taimi, e le’i mautū ane se faai’uga a Naidoo, ma na ta’ua e Anderson na ia lē soona talanoa i nisi i le la faasoa ma Naidoo, i tulaga o puipuiga lava o faamatalaga.
Mulimuli ane, i le amataga o Iuni, na faamaonia ai e Naidoo lona tuuina atu o lona igoa mo le lisi a le vaega faaupufai a le Leipa
Ua ta’ua e le Komesina o Leoleo, Richard Chambers, ua lē toe talafeagai le tulaga o Naidoo i totonu o Leoleo, ona sa tatau ona vave faailoa atu ia te ia ana fuafuaga e aga’i e tauva i upufai a malo.
O loo faia nei se iloiloga e su’esu’e ai le vaitaimi na amata fesoota’i ai Naidoo ma le Leipa, ma su’esu’eina foi e faasoa atu e lea alii o ni faamatalaga ma’ale’ale a leoleo i lea vaega faaupufai.
Peita’i, lea ua faailoa mai i le mae’a su’esu’eina o tusitusiga i luga o imeli a Naidoo e le’i maua ni faamaoniga o lona fesoota’i atu i le Leipa, e lē o iai foi ni tulaga e ono faapopoleina ai le liki ai i tua o ni faamatalaga ma’ale’ale.
Puna o Faamatalaga: https://www.rnz.co.nz/news/politics/987153/police-manager-sorry-for-confusion-over-superintendent-rakesh-naidoo-s-bid-to-stand-for-labour
