Ua faamaonia mai i ripoti a le leitio faavaomalo a Niu Sila, le maliu ai o se talavou i Waikato ona o aafiaga o le faama’i o le meningococcal poo le fivafai’ai, ma ua una’ia ai tagata ina ia māta’itūina lelei āuga o lenei faama’i, ina ia amata faatino loa tuipuipui.
Ta’ua na faamaonia mai le uma ai o le ola o le talavou, e le sui o le Health New Zealand Waikato le maliu o lea talavou, ma tuuina atu ai faamaisega a le auaunaga o le soifua mālōlōina i aiga o uō ma ē masani.
O lenei faama’i o le meningococcal e fai lava sina ogaoga o aafiaga pe a maua ai le tagata, e tulaga mata’utia le aafia ai o le fai’ai o le tagata tulou, ma tulaga ogaoga o le toto o le tagata, pea faamatalaina i le gagana Peretania (serious infections around the brain and can lead to blood poisoning).
Mo le silafia o lenei faama’i e tele ina aafia ai fanau laiti, ma tupulaga talavou.
O āuga o lenei faama’i e aofia ai le fiva, o le malō o le ua, le tigā o mata i le malamalama, ma tulaga o le fenumia’i o le mafaufau.
Faamauina i le amatamataga foliga vaaia i āuga faapei o se tagat aua maua i le fulū, ma e ta’ua e vave lava ona suia ma faateteleina tulaga o le ma’i o le tagata i totonu o nai itula e tusa ai ma faamaumauga o lenei faama’i o le fivafai’ai.
Faamauina i ripoti, e faia fua le tuipuipui o le meningococcal B mo pepe ma tamaiti i lalo ifo o le lima tausaga le matutua.
Ta’ua e mafai foi ona faia fua tuipuipui, mo i latou e 13 i le 25 tausaga le matutua, i totonu o le ulua’i tausaga talu ona nonofo i ni nofoaga e to’atele tagata o loo latou nonofo faatasi ai.
Ua fautuaina tagata ina ia vave sa’ili fesoasoani faafoma’i pe afai ua o latou maitauina ni faailoga vaaia o lenei faama’i poo āuga, aemaise ni popolega ua iai i le ono aafia ai i lenei faama’i.
Puna o Faamatalaga: https://www.rnz.co.nz/news/health/1012149/young-adult-dies-of-meningococcal-disease-in-waikato
