Ua faamauina nei i le tala faasolopito o le ulua’i polokalame o le vaiaso o le fa’aaliga o Measina a Samoa o lenei tausaga e 2026, le sola ai o le fautasi o le Little Rina ma le siamupini o fa’āgatama i le tai. E pei ona sa maimoaina e le atunuu i faasalalauga tuusa’o o le malosi o le matagi sa faafetauiina le tu’uga ma sa tofotofoina ai ma tapenaga i le malolosi o auvaa .
O le i luma o le fautasi o le Telefoni o le Vainuu i le amataga e lei faavaivai ai kapeteni ma auvaa o fauitasi sa manao uma i le manumalo. O suiga o ape foe ma le faamalosi a le kapeteni o le Little Rina na se’ese’e malie ai i luma ina ua lalata ane ile tolotolo i Mulinuu ma fa’aauau ai lava seia oo ina tini ao taumafai atu le Telefoni o le Vainuu na mua i tu’uga o foe samoa i tu’uga fautasi o le tatou sisigafu’a poo le tutoatasi ia Iuni.
Le kapeteni o le sā o le Little Rina afioga Matuaotofiga Faagalu Fonoti, i sona finagalo i auaunaga faasalalau a le malo sa faasalalauina le tuuga fautasi.
I le ono o sa na auai lea sa ta’i luau ma fautasi o afioaga o Manono, Toamua, ma Apia, o le siamupini ua sola ma le tasi o sa mai le afioaga o Toamua le Little Rina, tulaga lua le Telefoni o le Vainuu mai Manono, tulaga tolu le isi sā o Aiga i le tai le Tava’esina, tulaga 4 le fautasi o le Apia Maroon 2, tulaga lima le isi sā o Toamua le Aviivii ae tulaga 6 le Apia Maroon 1 o le isi sā mai Apia.
O le fautasi lea sa taualo e leoleo ma ali’i ofisa o le pulega o le tinei ma galuega lavea’i i taimi o faalavelave faafuase’i i fa’agatama i le taimi o le tutoatasi i le masina o Iuni.
O le po anapo sa tumutumu ai le atunuu e maimoaina le fa’aaliga o le Samoa nei Galo sa auai aoga e ono, lea e tolu mai Savaii ma le tolu i Upolu. O le Aso Faraile le faaiuga o lenei vaiaso o le fa’aaliga o taavale teuteuina ma faalauiloa ai tama’ita’i e toavalu o le a sa’ilia ai se tausala o Samoa i le po o le Aso Toonai.
O le asō foi lenei o le a lau ai togi ma tufatufa ai faailoga o tauvaga uma e aofia ai ma le liki kirikiti faasamoa i le itupa alii ma tama’ita’i lea sa tausinio ai au kirikiti mai nisi o nuu ma afioaga i motu o Upolu ma Savaii.
