E 17 nu’u ma afio’aga i Upolu ua amana’ia ma faatāua a latou tapenaga e sauniuni ai i taimi e aafia ai Samoa i le mala faalenatura o galulolo poo tsunami, e ala i se fesoasoani mai  le malo o Amerika, le malo o Samoa ma pa’aga e pei o le vaega o fesoasoani i mala faalenatura a le malo o le Iunaite Setete e ta’ua o le National Oceanic and Atmospheric Administration, o le UNESCO Intergovernmental Oceanographic Commission, ma le UNESCO/NOAA International Tsunami Information center.

Ua fa’ailoa i se pepa o faamatalaga faalauaitele mai le Ofisa o le malo o Amerika i Apia o le fesoasoani sa tu’uina atu i nu’u ua amana’ia lo latou sao i tapenaga i ni tsunami e tutupu mai, ua faatutū ai masini e fa’ailo ai se galulolo, faapea le a’oa’oina o gaioiga talafeagai uma e fa’atino pe a tula’i mai ni galulolo.

O ia tapenaga ua iai le faatuatuaga o le a tausisia e tagata o nu’u ua amanaia lo latou sao i le polokalame i le manulautī tāua, o le faasaoina o ola ma soifua. O le vaiaso nei i le Aso Lua 29 o Setema na atoa iai le 17 tausaga talu le galulolo po o le tsunami i le tausaga e 2009 na fano ai soifua e 149; ma o nu’u e 17 ua muamua faatāua ma amana’ia a latou tapenaga e mai itumalo o Aleipata Itupa i luga ma Aleipata Itupa i Lalo ma le itumalo o Lepa.

Ua aofia ai Vailoa, Ulutogia, Lalomanu, Samusu, Ti’avea, Amaile, Saleaumua, Ulufaalalafa, Lotopu’e, Malaela, ma Satitoa, ae o A’ufaga, Lepa, Saleapaga, Siupapa, ma Vaigalu i le itumalo o Lepa.

O le aso 15 o Tesema o le tausaga nei o le a fa’atino ai se isi polokalame e faatāua ma amanaia ai isi nuu e 20 o loo lavea i le polokalame fesoasoani.