Ua sauni le ali’i o Enari Elijah Tevita e tautua le Malo o Samoa ma lo tatou atunu’u i le faai’uina ai i le manuia o lona taumafai i a’oa’oga sa feagai ma ia i le 4 tausaga i le Iunivesite o Aukilani, ua maua ai lona fa’ailoga maualuga o le Bachelor with Honours, i tomai tau inisinia i galuega faaeletise ma eletoroni poo le Bachelor in Electrical and Electronic engineering.

Ua fa’aalia e lona aiga o lea tomai inisia i galuega tau eletise ma eletoroni ua solisolimulivae ai Enari i tulaga aao o le tua’ā tamā o lona tamā le afioga, Ali’imalemanu Sasa Tevita, na avea ma ulua’i Samoa umia lea fa’ailoga ma tofia ai e avea ma pule Samoa muamua i le Faalapotopotoga o le Malosi tau Eletise i lo tatou atunu’u i tausaga ua mavae.

O lea foi tamāli’i e pei ona silafia sa sē’ei i le tofi faipule o Alataua i Sisifo i totonu o le palemene i ni paea’iga ua mavae. O tua’ā o Enari o le afioga Ali’imalemanu Eric Tevita ma le faletua le afioga Toleafoa Pativaine Petaia Tevita ma sa auai i le faau’uga o lo alo i le vaiaso ua mavae.

Ua momoli ai le faafetai a matua o Enari i le malo o Samoa na faatupeina aoaoga a lo la alo ua i’u manuia ma o le a toe taliu mai i le atunu’u e tautua le malo i ona tomai fa’ainisinia i eletise ma eletoroni.

Sa amata atu i Samoa a’oa’oga a lea alo ma tama fanau a Samoa, fa’aauau i le Iunivesite Aoao o Samoa na ia maua ai ni tulaga maualuluga seia oo ina maua lona avanoa sikolasipi e a’oa’oina ai i le Iunivesite o Aukilani.