O le malumalu o le Ekalesia Faapotopotoga Kerisiano i le afio’aga o Sapapali’i i Savai’i na faia ai le sauniga faafetai i le Aso Sa muamua o Oketopa, mo le aso faamanatu o faiaoga o le lalolagi le World Teacher’s Day o lenei tausaga, ma manatua ai le tautua a ali’i ma tama’ita’i faia’oga e le gata iai latou o galulue i le auaunaga, ae o ē ua fai i lagi le tuligasi’a sa iloga lo latou sao i le ola a’oa’oina o fanau a Samoa.

Ua molimoli ai le faamalo ma le faafetai a le malo e ala i le Minisita o le Matagaluega o A’oga ma Aganuu i faia’oga uma o le atunu’u, ona e ui i le tele o lu’itau o feagai ma faia’oga ae o loo taualo pea lo latou sā ma finau auā alo ma fanau a Samoa ia ola a’oa’oina ona o le lumana’i manuia lea o le atunu’u.

O se vaega lenei o le saunoaga a le Minisita, afioga Aiono Alec Ekeroma i le sauniga faafetai o le aso fa’amanatu o faia’oga i Samoa ma le lalolagi.