O le tapu a le Palemia ma le faigamalo i le taofia ona toe auai o tusitala o le nusipepa o le Samoa Observer i feiloa’iga a tusitala ma le ta’ita’i o le malo, ua faalautele atu nei ma ua faasā ai tusitala o lea auaunaga faasalalau ona toe auai e lipoti soo se mea fai ma sauniga a le Malo.

O le faamatalaga faalauaitele e auala mai i le Ofisa Sooupu o le malo e pei ona tu’uina mai i le afiafi o le Aso Faraile ua mavae, ua tali ai i le faitioina o le gaioiga na ave’esea faamalosi e se alo tama o le Palemia le meafaigaluega o le meapu’eata mai le tama’ita’i tusitala o le nusipepa, ao faia lana galuega i le sauniga o le Aso Faamanatu o le Matagaluega o Leoleo le police Remembrance Day, sa faia i lumā maota o le malo i le Eleele fou i le Aso Lua ua mavae.

O loo lipotia e le nusipepa na aveese faamalosi le meapu’eata ona titina lea o ata uma sa pueina, peita’i o loo faailoa i le fa’amatalaga fa’alauaitele mai le malo sa na o ata o le palemia na titina ma aveese. O lea gaioiga ua faailoa ai lava ile pepa o faamatalaga faalauaitele na mafua ona tupu lea tulaga ona o loo tumau pea le tapu faasaga ile nusipepa.

O le faamatalaga faalauaitele a le Asosi o Tusitala ma Tagata Faasalalau a Samoa ua tē’ena ma lē talia ai lea tulaga na tupu ona o se gaioiga ua aafia ma afāina ai le aiā tatau o le faatinoga o le galuega ile logologoina o le atunu’u.

O le talitonuga o le Peresetene ma le asosi ua na o le tapu o tusitala a le nusipepa e lē toe auai i se feiloa’iga a le Palemia ma le au faasalalau lea ua silia i le fā masina e le o toe faia, ae e lei iai se silafia o le faalapotopotoga i le tulaga ua fa’ailoa nei e le malo ua faasā soo se sauniga a le malo ona auai sui tusitala o le nusipepa. Peita’i o le faamatalaga mai le malo o loo fautuaina ai le asosi ina ia taulogologo le au galulue i lea tomai, ta’iala o le galuega e mulimulita’i ai.  

O le la’asaga lata mai ua oo iai lenei tapu faasaga i le Samoa Observer ua aumai ai faamatalaga faalauaitele mai se tasi o faalapotopotoga i le pasefika e tu mo le saolotoga o i latou o galulue i soo se auaunaga faasalalau i le  Pasefika, le Pacific Freedom Forum poo le PFF ua faitioina ai le gaioiga na tupu ma ua ave ai le tu’uālalo i le malo e silasila i auala aloa’ia i le faia ose sā’ili’iliga mae’ae’a i le aveesea faamalosi o le meapu’eata pe o se tulaga e talafeagai.

Ae  i le pepa o fa’asalalauga fa’alauaitele mai le malo, ua fa’ailoa ai lona faatāua o le saolotoga e faia ai le galuega a tusitala ma le au faasalalau, ma o loo tālia e le malo se faai’uga a le Fono Fa’atonu o Galuega Faasalalau le Samoa Media Council i lana faaseā ua tu’uina atu iai faasaga i le nusipepa o le Samoa Observer i nisi o a latou tusitusiga ma lipoti.