A’o tapena fanau i lo tatou atunu’u i le a’oina o tauloto, o tala ma pese faaleagaga mo lo latou Aso Sa pa’epa’e poo le lotu a tamaiti i le Aso Sa o le vaiaso fou, ua tala malae le Kolisi Faafaifeau i Malua i le vasega o A’oa’o ma o latou faletua o le tausaga tolu, i le faia o se polokalame o le lotu tamaiti mo fanau sauāina o loo i le va’aiga a le Toomaga mo e Puapuagatia i le nofoaga o le Campus of Hope.

O le Aso Sa na te’a nei na amata ai ia polokalame mo le umi e tolu vaiaso. O tala ma pese faapea siva faaevagelia sa fa’atino e le vasega Tausaga 3 o se avanoa tāua e molimauina ai e fanau o loo i le nofoaga o le Campus of Hope lagona o le fiafia ma maua ai le mafanafana o le pa’i atu o le feau faaleagaga i o latou olaga laiti ma talavou, a’o feagai ma mafatiaga o le tino ma le mafaufau ona o sauaga ua aafia ai.

Advertisement

Ua fa’aalia ai e le Peresetene o le Toomaga ia, Siliniu Lina Chang, le agaga faafetai i le Kolisi Faafaifeau i Malua, i le fa’aauau pea o le latou faigapa’aga, pe a oo i taimi o tapenaga o le Aso Sa e faasino i fanau.

O se tasi o avanoa na mua e ia fanau o le asiasiga a tama ma teine aoga o le Kolisi o le Ekalesia Aso Fitu o le Toe Afio Mai le MaCarthur College mai Sini Ausetalia. Sa latou afea foi le nofoaga ma mafuta ai ma fanau ua sauāina.

O avanoa uma ia e pei ona fa’ailoa e le Peresetene o le Toomaga, e maua ai e fanau o loo latou va’aia le avanoa e mafuta ma talanoa ai i nisi e le’i masani ma feiloa’i muamua iai, e maua ai nisi lagona ma mafaufauga e fesoasoani i o latou aafiaga mai sauaga.