E silia ile 300,000 tālā le tau o le tanevai tele e mafai ona teu ai le tasi le afe lita o le suavai mamā mo le afio’aga o A’ufaga ua mae’a i le agalelei o le polokalame fesoasoani a le malo o Iapani.

O le vaiaso nei na umusā ai lea galuega o le a fesoasoani tele i mafatiaga o lea nu’u o le itumalo o Lepa, pe a oo ina ‘uti’uti ma lē maua le suavai mo le fa’aaogaina e aiga i aso ta’itasi.

O le tausaga e 2024 na sa’ili fesoasoani ai le afio’aga i le ofisa o le malo o Iapani i Samoa ma faamanuiaina ai le latou asamoga mo se seleni e fausia ai se tanevai simā tele e mafai ona faalagolago iai aiga o le nu’u i taimi e fa’alētonu ai le suavai maua mo gasesega, le vai taumafa ma isi mana’oga masani e manaomia ai lea vaega tāua o le soifuaga o aso uma.

Fa’aalia e le malo o Iapani o se tasi lea o fa’amau fa’ailoga o le vāvā lalata o so’otaga o le malo o Samoa ma lona malo o fesoasoani e manuia ai tagata i totonu o nu’u ma afio’aga.