O loo faagasolo i lenei vaiaso i Samoa le ulua’i fono a sui o atunuu o le Pasefika o loo talanoaina ai le tāua o su’esu’ega faasaienisi e soosoo tau’au ma galuega tau i le pulea lelei o faigāfaiva mo le fagotaina o le tuna, o se igoa o loo taaofa’i ai i’a o le atu, le ‘asi’asi, ma le apakoa.
O le tāua o lea faatasiga ona o loo talanoaina ai auala ma faiga e puipuia ai ogasami o le Pasefika mai le soona fagotaina o le tuna ma pulea lelei mai auala tau faigāfaiva e ono faaitiitia ai.
O le faamamafa sili ona tāua o loo autū iai le fonotaga na tatala e le ta’ita’i o le malo, o le pulea lelei o faigāfaiva ma su’esu’ega faasaeinisi, mo le faatumauina o le manuia o lea atina’e i le lumana’i mo atunuu o le Pasefika e pei o Samoa.
O loo feagai le atina’e o faigāfaiva i le Pasefika i le fagotaina o le tuna ma se tasi o lu’itau o le tulaga lea o le maua pea ma le faaitiitia.
E 26 atunuu o loo auai faatasi ai ma sui o nisi o atunuu o le lalolagi o loo lotolotoi i le faamaopoopoina o faamaumauga faasaienisi, o loo autū i se vaaiga taula’i i le lumana’i mo lea atina’e o le gataifale.
