Ua maliu se alii ina ua fana e leoleo i se faalavelave na tula’i mai i le Sylvia Park Shopping Centre i Mount Wellington i le aso ananafi.
I ripoti na ta’ua ai e leoleo, na amata tula’i mai faafitauli o lenei faalavelave poo le itula e 2 i le aoauli, ina ua gaoia e lē ua maliu se laaumalosi, o le air-rifle mai le Gun City i Penrose.
Ma o lea sa ia aga’i atu i se taavale, faamatalaina na tuliloa e leoleo lea taavale pa’epa’e o le Suzuki Swift, ma na lipotia mai e fai lava sina lē saogalemū o le alu a lea taavale i le aga’i atu i le auala o le Mount Wellington Highway.
Na tia’i e le alii le taavale i fafo ane o Sylvia Park, ae tamo’e ma sola ese, a o iai pea ia te ia le laaumalosi.
Faamauina e latalata le alii i le faitoto’a e ulufale atu ai i le Mall ae fana loa e leoleo; ae ta’ua na i lona lima lava le laaumalosi i le taimi na fana atu ai o ia.
Māua na taumafai atu sui o faalavelave tutupu faafuase’i e lavea’i le alii peita’i na maliu lava o ia i le nofoaga na tula’i le faalavelave.
Faamaonia e leoleo, o le alii sa tatala mai o ia i tua i lalo o aiaiga, poo le bail ae alia’e mai ai loa lea faafitauli.
Ua faia nei se su’esu’ega faapitoa i le faalavelave, ma ua logoina fo’i le Independent Police Conduct Authority, i tulaga uma o lenei matāupu.
Na ta’ua e Superintendent Sunny Patel, ua tuuina atu foi se fesoasoani i le leoleo na fanaina lē ua maliu, ma ia faamaonia mai le tuu atu ai o le lagolago a le auaunaga, ma o le a faaauau pea lea fesoasoani.
Ua talosaga leoleo i soo se tasi e iai ni ata mai telefoni poo dashcam o le faalavelave, ina ia tuuina atu mo a latou su’esu’ega.
Puna o Faamatalaga: https://www.nzherald.co.nz/nz/auckland/sylvia-park-shooting-police-investigation-underway-after-man-fatally-wounded-at-mall/JHKTHYTUFRAZXLTCE7OGAEXHDE/
