Ua faailoa e le Ofisa o le Vaaitau, le faaauau ai ona itiiti o timuga e palasi ae malosi ai ma mūgalā i le masina nei o Aokuso se’ia oo ia Oketopa ma ua magumagu ma mamago ai ma le laufanua e māfua i uiga o le tau ua faaigoaina o le Elenino.
O ia fua aliali o uiga o le tau ua aafia ai Samoa ma nisi o motu o le Pasefika o se mū i se vaega o togāvao i nuu o Samalaeulu ma Pu’apu’a, i le faai’uga o le vaiaso lea na faanatinati atu iai le galuega fesoasoani a le Pulega o le Tineimū ma Galuega Lavea’i i le motu o Savaii.
Ua ave ai se fautuaga a le pulega o le tineimū i ia afio’aga ma nuu tu lalata iai ina ia taofia le susunuina o le laufanua mo faato’aga, ma taofi le susunu o otaota ma lapisi ona e ono tula’i mai ai ni faalavelave e lamatia ai le saogalemū o le soifua o tagata.
O afio’aga o Samalaeulu, Pu’apu’a, Patamea ma Saleaula faapea nuu o loo sosoo atu ai ua ave iai le tuualalo ina ia galulue alii ma faipule i le māta’itūina o tulaga ua tula’i mai ma fai iai se galuega e lagolago ai i le taofia o nisi mū o le togavao e toe tula’i mai.
O loo faamauina le vaitaimi faapenei o le tausaga e 2008 na tula’i mai ai ni mū tetele i laufanua o afio’aga o Asau ma Aopo a o malosi foi mūgalā i le tau o le Elenino ma faatama’ia ai faato’aga i lea vaega o le motu o Savaii.
E tusa ma le luaafe eka le telē o le laufanua na aafia ai i lena mū.
