Ua faamaonia mai nei e le United Kingdom Anti-Doping, le faalēaogāina ai o tuua’iga o le faaaogāina o fuālaau faasāina e le alii fusu Samoa o Joseph Parker, ma ua toe tatala ai le avanoa e toe fusu ai lea alo o Samoa, mai le lata i le tausaga o faasala.
Faamauina i ripoti mai le NZ Herald, i sa’ili’iliga ma su’esu’ega na o latou māua ai o le alii foma’i o mea’ai taumafa poo le nutritionist na galulue faatasi ma Parker, lea na māfua ai ona aafia le alii fusu, o lea lava na ia ioeina lona faaaogāina o fuālaau faasāina.
Mo le silafia na tula’i mai lea matāupu, i le mae’a ai o le taaloga o faipelega a Joseph Parker ma le alii o Fabio Wardley i Lonetona i le tausaga na te’a nei.
I le aafia ai o lea alo o Samoa i lea matāupu, e faapea na mua’i maua pe faamaonia le aafia o Joseph Parker ina ua fai lana siaki mo lana fusuaga ma Fabio e le vaega o su’esu’ega Voluntary Anti-Doping Association (VADA) ae toe faamautū ma faamaonia e le United Kingdom Anti-Doping le aafia pea o Parker.
Ma o lea na faasala ai loa le alii fusu Samoa ae se’i faatino su’esu’ega.
Ae e ui i aafiaga ma le lē mafai ai ona fusu Parker, o lea lava na ia ta’ua lona faamagaloina o lona nutritionist.
Ua ia ta’ua foi ua sauni e toe foi i le malae fusu e faaauau lana taleni ma taumafaiga ua fai sina umi o le taimi na mālōlō ai ona o ia aafiaga.
Puna o Faamatalaga: https://www.nzherald.co.nz/sport/boxing/doping-body-says-joseph-parkers-positive-cocaine-test-caused-by-nutritionist/BYSVWOWUIRBXTD5UGJMRZIKQOQ/
