Ua tuli le faasalaga e lua tausaga ma le valu masina i le falepuipui o le taule’ale’a o Steven Tuamoheloa o le isi ona igoa o King Afa Toe mai ‘Ili’ili Amerika Samoa ma Leonē i Apia, ina ua faamaonia lona ioeina o moliaga o le umia o laau faasāina o le maruana, ma le umia o ututau ma se laau malosi, faapea le umia o ni meafaitino e pei o se paipa ma se straw e fesoota’i uma i le faaaogāina o fuālaau faasāina.
Na tetee malosi le alii o Steven i moliaga a leoleo ae ina ua faia teuteuga a leoleo i ona moliaga na suia ai loa lana tetee i le ioe i solitulafono na tuua’ia ai.
O le osofa’iga a leoleo i le pitonuu o Leonē i Apia ia Tesema o le tausaga na te’a nei na pu’eina ai lē ua molia ma taofia mo su’esu’ega, lea ua mae’a lona faamasinoga ma ua amata tuli lona faasalaga i le falepuipui i Tanumalala.
