Sa iai le fuafuaga a le kamupani vaalele o le Samoa Airways e togafiti faaletonu o le tasi o ona vaalele twinotter na aafia i se faalavelave i le malae vaalele i Fitiuta i le lua vaiaso ua mavae, ona taumafai lea e aumai i le nofoaga i le malae vaalele i Faleolo e faia isi galuega, peita’i e lē faigofie ona faatino lea tulaga.
O lea ua faia ai le faai’uga e sili loa ona talai vaega autū o le vaalele e faigofie ai ona aumai ma toe faapipii i le fale e tutū ai vaalele i Faleolo.
O le galuega lea na amata faatino i le vaiaso nei ina ua mafai ona sisi ese e se masini mamafa le vaa mai le vaega i autafa o le malae vaalele i Fitiuta na oso iai ona o le malosi o savili.
O alii inisinia mai le kamupani o le Unity Aviation mai le atunuu o Kanata o loo feagai ma le galuega i le taimi nei e pei ona faailoa e le Samoa Airways faatasi ai ma inisinia a le kamupani vaalele a Samoa.
Ua ave ai le faafetai a le Samoa Airways i le auaunaga a le American Samoa Ports Authority ma le Silver Group i Pago Pago i le galuega ua mae’a aveese ai le vaalele mai le vaega sa tifa iai ina ua tulaueleele, ma ua mafai ai ona faatino isi galuega mo le aumaia i Samoa o le vaa.
