Ua faia se faamata’u a le Peresetene o Amerika Donald Trump i soo se atunuu e fesoasoani ia Iran pe fai pisinisi faatasi foi ma lea atunuu.
Ua ta’ua e le BBC o le faamata’u a Trump ua ta’ua ai e maoa’e ni tulaga tau le tamaoaiga o le a iai mo sea atunuu pe afai e fesoasoani ia Iran.
Ua faia ia faamata’u i le mae’a o le 60 aso sa faamatuu ane mo se maliega ma Iran e faamuta ai le taua peita’i e leai lava.
O le gaioiga la ua faia e Trump ua foliga ua toe faaauau ai ma le pressure campaign le Operation Economic Fury lea na amata ia Aperila e faasā ai faletupe mai fafo ona fai pisinisi ma Tehran.
Ua faailoa e Trump o soo se atunuu lava la e na te iloa o loo fesoasoani ia Iran o le a feagai ma lu’itau tau le tamaoaiga e pei ona ta’ua.
E lē o faamanino maia poo ā ia lu’itau ae fai mai Trump o le nanā ane o suāuu, lafo ane o tupe, fesuia’iga o fale, lesitalaina o vaa ma gaioiga tau pisinisi ua tatau ona taofi uma nei ma o loo silafia e i latou o loo faia lea tulaga, le latou gaioiga o loo faia.
Ua ta’ua e le BBC o Novema isi palota a Amerika ma o loo feagai Trump ma lu’itau i le matāupu e faatatau i le tele o le tupe ua faaalu i le taua lea ma Iran.
Puna o Faamatalaga: https://www.bbc.com/news/articles/c2k7e83ynj4o
