Ua amata ona valaau molimau a leoleo ma su’esu’e i le Faamasinoga Maualuga moliaga o tagata e to’atolu e aofia ai se tama’ita’i, o loo tuua’ia i le aumai faananā i Samoa i se pusaoloa o fuālaau faasāina o le ‘aisa e tusa ma le 10 kilokalama le mamafa.
O se faamasinoga o loo molia ai foi le tasi o i latou ia e to’atolu i le moliaga o le taumafai e faatino se gaioiga faaālatua i le ave o se tinoitupe e tusa ma le selau afe tālā i se tagata faigaluega o le ofisa o le tiute i se taumafaiga e natia ai ona faailoa fuālaau faasāina na aumai mai Amerika i le pusaoloa.
O i latou o loo molia o le tamā matua o Roderick Ignasius Mackenzie e 74 tausaga o le soifua, o le taule’ale’a o loo maupaolo i se tasi o alo tama’ita’i o Roderick o Peter Hanipale 40 tausaga le matua ma le tama’ita’i faigaluega i le pisinisi a Roderick Mackenzie o Jacinta Selafi Chung Kwan ua 57 tausaga o le soifua.
O Pesega o loo faagaioia ai le pisinisi o se faleoloa supamaketi na su’eina e leoleo ina ua maua le pusaoloa e 20 futu le umī a lea pisinisi o loo aumai faananā ai le ‘aisa.
O le Aso Lua o lenei vaiaso na amata valaau ma su’esu’e ai molimau o lea matāupu tau faamasinoga.
