Ua amata sa’ili nei e lē sa avea ma kapeteni o le Manu Samoa, Chris Vui, le lagolago ae o se fesoasoani tau tupe e faamae’a ai se ata poo se documentary e faamatala ma faaailoa ai ona lu’itau i le matāupu ua faasala ai nei o ia, ona o aafiaga tau fuālaau faasāina.
I le tula’i mai ai o lea matāupu, e 4 tausaga le faasalaga a le alii o Chris Vui na tuuina mai e le World Rugby, ina ua faamaonia i su’esu’ega lona aafia ai i fuālaau faasāina.
I faamatalaga na faamaonia lona aafia i le fuālaau faasāina o le 19-norandrosterone, a o lumana’i ai le taamilosaga o le Ipu o le Lalolagi i le lakapi i le tausaga e 2023.
O loo teena pea e lea alii e 33 tausaga lona matua, tuua’iga o lona faaaogāina o fuālaau faasāina; o lona talitonuga na māfua ona aafia, ona o se pauta mo taumafataga i tulaga o le soifua mālōlōina ua leaga ma faalēaogāina poo se contaminated supplement.
E le’i manuia ana taumafaiga i le apili ai o lona faasalaga i le Court of Arbitration for Sport.
Ma o lea ua faailoa mai o le ata poo le documentary, ua faaigoaina o le SPIKED, o loo tuufaatasia ma faatonutonuina e le Tusitala Film.
Ua ia faamanino o le a faasoa ai ma faatalanoa tala a tagata taa’alo na faamaonia le aafia i fuālaau faasāina ae o le finau na māfua ona aafia ona o tulaga o le faaleagaina poo le faafefiloiina o supplements na taumafaina e ia sui taa’alo.
Ua faailoa e Vui le faigatā tele o loo iai ma le tulaga ua lē maua le avanoa e taalo ma tautua ai i le taaloga lakapi.
O loo iai le faanaunauga o lea alii ina ia maua le oo atu i le US$27,000 e faamae’a ai le tuufaatasia o lenei documentary, ma le faamoemoe ina ia faamamā lona igoa.
Puna o Faamatalaga: https://www.rnz.co.nz/news/pacific/972278/former-manu-samoa-captain-fights-to-clear-his-name
