Na molimauina le patipatia o taleni o pese ma le musika a tagata Pasefika i totonu o Niu Sila e tauala i le faatasiga tele o le Pacific Music Awards 2026.
O le alii pese o R&B mai Aukilani, o Sam V, o se tasi na matua’i iloga ana taumafaiga i le po o tufatufaga faailoga, i le 3 o faailoga na ia manumalo ai – Best Pacific Male Artist, Best Pacific Soul/R&B Artist, faapea le Best Pacific Song mo lana pese Small Taste, sa galulue faatasi ai ma Jaedyn Randell.
O le tulaga mata’ina, ua lima tausaga sosoo o manumalo pea Sam V, i le faailoga o le Best Pacific Soul/R&B Artist.
Maitauina foi le mata’ina o taumafaiga a le aufaipese iloga o le Signature Choir mai Ueligitone, lea na faamauina e 3 faailoga na o latou mauaina e aofia ai le Best Pacific Gospel Artist, People’s Choice Award ma le Special Recognition Award.
O le fa’ili a nisi o alo o Samoa, poo le heavy metal band o le Shepherds Reign, na manumalo i le Best Pacific Music Video mo le pese Samoa Mo Samoa, na faatonutonuina e le alii o Twayne Laumua.
Na manumalo Three Houses Down i le faailoga o le Best Pacific Roots/Reggae Artist, ae manumalo le alii o Scribe i le Best Pacific Music Album mo lana album Scribe Is Dead.
Na molimauina le patipatia ai o se tasi o sui tuai iloga o le musika mai le Atu Kuki, Will Crummer, o le faailoga faapitoa o le Pacific People’s Lifetime Achievement Award, ona o lona sao i musika a le Pasefika mo le silia ma le 60 tausaga.
Ae e ui ua tuumalo le alii pese ta’uta’ua a Fiti, o George Veikoso, poo Fiji e iloa ai e le to’atele, ae na ia mauaina pe na manumalo i le faailoga o le Best International Pacific Artist.
O lenei faatasiga tele poo tufatufaga faailoga mo tagata faimusika ma tagata pepese o le Pasefika, o loo atagia ai le telē o le sao ma le mata’ina o taumafaiga a tagata Pasefika i totonu o Niu Sila ma le lalolagi atoa.
Puna o Faamatalaga: https://www.rnz.co.nz/life/music/all-the-winners-at-the-2026-pacific-music-awards
