Ua maitauina le mata’ina o taumafaiga o ʻau a Samoa i Taaloga a Malo o le Taupulega 2026 o loo faia i Glasgow i Sikotilani, e pei foi ona maua ai le ulua’i pine ma ua maua ai ulua’i pine a le atunuu i nei taaloga.

E toʻa 21 tagata taaalo o loo fai ma sui o Samoa i nei taaloga, e aofia ai le siisii uʻamea mamafa, faipelega, afeleti, aau ma le taaloga o le judo.

Advertisement

O le tulaga sili ona mataʻina e oo mai i le taimi nei, o le ausia lea e le ʻau siisii uʻamea mamafa a Samoa o se ulua’i pine muamua a le atunuu e pei ona manumalo John Lautafi Tafi i le pine siliva i le vaega o alii e 71 kilokalama, ina ua maeʻa sana taumafaiga.

O loo iai pea isi sui o Samoa o loo sauni atu mo a latou tausiniōga i aso o lumana’i.

O le tama’ita’i o Symone Tafuna’i na tausiniō i taaloga o afeleti i le vaega 100 mita a tama’ita’i, ma na lona 4 i le vaega poo le Heat lona 8.

I le siisii uʻamea mamafa, o le a tauva ai Seine Stowers i le vaega o tamaitai e 77 kilokalama le mamafa i le aso 29 o Iulai o le asō lea.

O le aso lava lea e tauva ai foi Emmanuel Shalom Palota Ulimasao i le vaega o alii e 94 kilokalama le mamafa, faapea ai ma Sefulu Seuao i le vaega o tama’ita’i e 86 kilokalama le mamafa.

I le taaloga o faipelega o loo sauni Michael Seko i le vaega o alii e silia i le 90 kilokalama le mamafa.

Na manuia taumafaiga a Marion Ah Tong i lana ulua’i taaloga i le vaega a paga mamafa o alii e 70 kilokalama, ina ua ia faato’ilaloina le sui mai Kiribati.

O lea ua saofagā atu lea alo o Samoa i le quarter-finals, mo sona avanoa i pine. 

I le afeleti, o le a tauva ai Nuuausala Tuilefano i le vaega o le togi pulu mamafa a tama’ita’i (Women’s Shot Put).

I tulaga o le aau, na tausiniō ai Nafanua Malia Hamilton, Paige Schendelaar-Kemp, Christian Iulai Toia, ma Johann Roberto Suhren Stickland, ae o Peniamina Percival o loo tausiniō i le judo.

O loo maualuga pea le faamoemoe mo le ʻau a Samoa, a o faaauau pea tauvaga i Glasgow, ma o loo iai le faamoemoe e faaopoopo atu nisi pine mo le atunuu i Taaloga a Malo o le Taupulega.

Puna o Faamatalaga: https://www.nzherald.co.nz/sport/commonwealth-games/commonwealth-games-live-updates-silver-ferns-face-uganda-lewis-clareburt-and-zoe-hobbs-go-for-gold/VG6QKQC2ANHB7ECVM3OWF6D4DA/