I le silia ai nei ma le 86 o tausaga o le soifua auauna i le malo o le afioga i le faipule o Faasaleleaga Numera 4 le afioga Tea Tooala Peato, ua tusi aao iai le ta’ita’i o le malo le afioga i le Palemia e see atu e avea ma se tasi o Minisita o lana Kapeneta, ma tuu iai le vaaia o le Ofisa o le Komesina o Sulufa’iga ma le Ofisa o le Fono Aoao Faitulafono.
Ua toe atoa ai nei le saofa’iga a Minisita e 15 o le Kapeneta ua aofia ai le Palemia, i le tuana’i o le faai’uga a le Faamasinoga o Faigāpalota ua avanoa ai le nofoa o Falealili 1 sa sē’ei lo latou tofi faipule i le Kapeneta ma avea ai ma se tasi o Sui Palemia.
O le filifilia o le afioga Tea To’oala Peato e avea ma Minisita ua faailoa ai e le Palemia le toe fetuuna’i o nisi o auaunaga a le malo sa i lana vaaiga ae ua ia tauave le vaaia o le Matāgaluega o Galuega Tetele a le Malo, o le Faalapotopotoga o Vaa, Kamupani Vaa, Pulega o Uafu ma Taulaga, Faalapotopotoga o le Malosi Tau Eletise, Pulega o Feoa’iga i Luga o le Laueleele, Pulega o Malae Vaalele, Pulega o le Suāvai, ma le Kamupani Vaalele o le Samoa Airways.
O isi auaunaga a le malo i le vaaiga lava a le Palemia o le PUMA ma le kamupani vaa o le Pacific Forum Line.
O le tama’ita’i Minisita o Tupe le afioga Mulipola Anarosa Ale Molioo, ua tuuina atu iai nisi o auaunaga a le malo na te vaaia e pei o le Komisi o Tagata Faigaluega a le malo ma le komiti o totogi le Remunenaration Tribunal.
O le Pulega o le Tineimū ma Galuega Lavea’i i taimi o Faalavelave faapea le Faalapotopotoga o Fale ma le Nofoaga o le Toe Fuata’ina o tupulaga talavou i Olomanu, ua tuuina atu i le Minisita o le Matāgaluega o Aiga ma Aga Fesoota’i.
O le Komiti o Sikolasipi a le malo ua tuuina atu i le vaaiga a le Minisita o A’oga ma Aganuu.
O le Pulega o Taaloga Faitupe ma le Komiti Faafoe o Taaloga o Petipetiga ua i le vaaiga a le Minisita o le Matāgaluega o Pisinisi, Alamanuia ma Leipa.
Ua faailoa foi e le Palemia e fā Sui Minisita mo Matāgaluega ma Faalapotopotoga ua ia vaaia.
O le Sui Palemia ua faaopoopo iai le Minisita o Tupe Maua e avea ma Sui Minisita mo auaunaga uma o loo i le vaaiga a le Sui Palemia, ma le Minisita o Faamasinoga ua avea foi ma Sui Minisita mo le Matāgaluega o Eleele ma Fuagafanua.
O le sui faipule filifilia o Safata 2 lea ua mae’a ona faatautō i le tuana’i o le palota laitiiti a lea itumalo faapalota le afioga Tuiā Fuatogi Pu’a Letoa ua tofia o le Minisita Lagolago o le Ofisa o le Komesina o Sulufa’iga ma le Ofisa o le Fono Aoao Faitulafono ma o le a galulue ai ma le minisita filifilia le afioga Tea To’oala Peato.
Ua manino mai i le toe fetuuna’iina o Minisita ma Sui Minisita, o le tofi Sui Ta’ita’i o le a faaauau ona tauave e le faipule tama’ita’i o Palauli i Sisifo mo le paea’iga atoa e aunoa ma le toe tofia o se isi Sui Palemia e pei ona sa amata a’i tofiga o le faigāmalo o le Paeaiga 18 a le Palemene.
E pei ona silafia sa iai le fuafuaga e teuteu le faavae mo le faaofiina o le tasi o tofi Sui Palemia ona e na o le tasi lava le Sui Palemia o loo aiaia i le tulafono faavae.
