I se faatasiga i lenei vaiaso na faalauiloa mai ai e le Minisita o Fela’ua’iga, Chris Bishop, o le a tatala aloa’ia le City Rail Link i le aso 13 o Setema 2026.
O lenei galuega e tusa ma le 5.5 piliona tālā, ma ua avea ma galuega tele i femalaga’iga ua sili ona taugatā i le talafaasolopito o Niu Sila.
O le tulaga mālie i le faatautaia ai o le faalauiloa, na muamua ona iloa le aso e tatala ai lea galuega tele ae le’i faailoa mai e le Minisita, ina ua tuu mai i luga o laupapa faapipii mo faalauiloa poo Ads le aso ae sa lē tatau ona oo i lea tulaga, ae o se gaioiga na tuua’ia e le Auckland Transport aga’i i le auaunaga na faia ia laupapa faapipiii mo faalauiloa.
Ta’ua i faamatalaga ma ripoti mai le leitio faavaomalo a Niu Sila, i le amata faasolo ai ma le tatala o ia nofoaga fou, ta’ua o le a molimauina ai le laiti o le taimi e faatali ai le tagata mo le nofoaafi e taunuu atu; faapea e ta’i lima minute ma taunuu i taimi pisi.
I ia taimi fou o le a vaaia ai le tuuitiitia ai o taimi e faatali ai tagata ma taimi e faimalaga atu ai mai lea itu i lea itu.
O le a mafai foi ona asia nofoaga fou auā maimoaga a tagata lautele, i nai aso e lē o toe mamao.
