O le vaaia i luga o fesoota’iga televavave le api o foliga, o ata o le Ta’ita’i o le Itu Agai ma leoleo o loo faia se gaioiga o le loka o aao o le susuga Tuilaepa L Sailele Malielegaoi i handcuffs, ua aumai ai se lapata’iga malosi mai le Matāgaluega o Leoleo, Falepuipui ma le Toe Fuata’ina ia i latou o loo faaaogāina faiga faatekonolosi o le AI e fausia ai ituaiga o ata faapea e lē moni ma ua faasesē ai le to’atele.
O lea ata na faasalalau o loo tauave ai le faailoilo poo le LOGO a le matāgaluega o leoleo peita’i o se gaioiga taufaasesē.
Ua fautuaina ai le atunuu lautele aemaise le to’atele o loo sa’eu i aso uma le upega tafa’ilagi o le facebook ina ia matuā sa’ili’ili lelei ia ituaiga o faasalalauga ona ua tele ma anoanoa’i itulau pepelo poo fake pages o loo alu ai faasalalauga faapea.
Ua su’esu’eina nei e le matāgaluega le faasalalauga pepelo ma faamatalaga sesē o loo iai.
O ni faamatalaga e faaleaga ai le tamaliiaga o se tagata ma lē maua ai se nofo lelei o tagata i luga o upega tafa’ilagi.
