O le to’agaogao o faamasino o le Faamasinoga Sili poo le Faamasinoga Maualuga, ma itiiti ai le tulaga avanoa o se faamasino e seei i matāupu e su’esu’eina e le Faamasinoga o Talosaga Apili a le Faamasinoga o Fanua ma Suafa, ua filifilia ai se tasi o Sui Pelesetene o loo galue i le Faamasinoga Maualuga o Fanua ma Suafa e avea ma Sui Faamasino o le Faamasinoga Sili i le fuafuaga e galue i le faamasinoga o talosaga toe iloilo a le Faamasinoga o Fanua ma Suafa.
O le Aso Lulu o le vaiaso nei na faamautū ai lea filifiliga ina ua faatauto le afioga Siliga Diana Roma e avea ma Sui Faamasino o le Faamasinoga Sili, a o galue ai o se tasi o Sui Pelesetene.
Sa faamanino mai e le Ofisa Sili o le pulega o le matāgaluega o faamasinoga lea filifiliga i se faatalanoaga.
Le Ofisa Sili o le pulega o le Matāgaluega o Faamasinoga ma le Faafoeina o Matāupu Tau Faamasinoga susuga Papalii John Taimalelagi Afelē.
