O se vaaiga maoa’e le molimauina e le to’atele o tagata maimoa i le taaloga i le va o le All Blacks ma le Sharks, le faatino ai e le alii o Maa Nonu na o ia o se haka, aga’i i le ‘au ua leva ona ia taalo ma tautua ai.
I ata i le amatalia o siva tau, poo le Haka a o le’i iliina le fā’ili o le taaloga, na molimauina ai le leo tetele o tagata, o le agaga o le fiafia ma le patipatia ai foi o le haka a Maa Nonu, e tali atu ai i le haka a le All Blacks.
E lē o se taimi muamua lea ua faatino ai e sē sa taalo mo le All Blacks le haka e tali atu ai i le ‘au tele a Niu Sila, ae o se taimi muamua lea i le talafaasolopito ua faatino ai e se tagata e to’atasi poo le vaega ua ta’ua o le solo responder.
O vaaiga mata’ina ma le matagofie, o le maua ai o le avanoa o lea alii iloga o le taaloga e faatino ai se haka, e sa’afi ai i le ‘au na tautua ai.
Ae i le taunuuga o lea taaloga na manumalo le ‘au a le All Blacks i le Sharks i ‘ai e 54 i le leai.
Puna o Faamatalaga: https://www.nzherald.co.nz/sport/rugby/all-blacks/all-blacks-v-sharks-maa-nonu-responds-to-all-blacks-haka-before-tour-match-in-durban/7WSPP6TUTBBH7K7PBWWFZWLWAE/
