E to’asefuluvalu tagata ua faailoa e le Matāgaluega o Leoleo, Falepuipui ma le Toe Fuata’ina le pu’eina ma molia talu ai nei i ni osofa’iga sa sa’ilia ai nakoti poo fuālaau faasāina.
I lea aofa’iga, e to’atolu ni tagata mai fafo na pu’eina ai ma molia i solitulafono e fesoota’i i le umia o nakoti.
Photos: Samoa Police, Prisons & Corrections Services
O alii uma e to’atolu e aofia ai le alii o Connor Strickert e 25 tausaga le matua mai le atunuu o Thailand ma Amerika, ma Ruel Gasiles e 43 tausaga le matua ma Rodel Gritz e 39 tausaga le matua mai le atunuu o Filipaina.
O le to’asefuluvalu foi o tagata ua aofia ai i latou ia na pu’eina ma molia e leoleo ua aofia ai tama’ita’i e to’avalu.
Ua faaalia e leoleo o loo faaauau pea a latou osofa’iga poo drug raids o loo su’eina ai nofoaga o loo masalomia o loo faatino ai solitulafono tau fuālaau faasāina.
O loo faafetaia ai e le matāgaluega le lagolago atu pea o le atunuu aemaise o pulega mamalu a alii ma faipule e ala i faamatalaga o loo mafai ona fesoasoani i osofa’iga aemaise o su’esu’ega a leoleo.
