O le faai’uga a le faalapotopotoga tele o le taaloga faipelē poo le fusu i le lalolagi le International Boxing Federation poo le IBF, e aveesea le fusi o le siamupini o le lalolagi i le paga o le cruiserweight o loo umia e le alii fusu Ausetalia ae o se alo o Samoa o Jai Opetaia, ua faaulu ai se su a lea alii fusu faasaga i le IBF.
O le sainia o se maliega a Jai ma le itutino e faatautaia taaloga fusu o le Zuffa Boxing o le māfua’aga lea o le faai’uga a le IBF e aveesea le fusi o le siamupini o le Cruiserweight mai lea alo o Samoa.
Faaalia e Jai Opetaia i lipoti faavaomalo o se faai’uga ua taupulepule ai lea faalapotopotoga tele o faipelēga a le lalolagi ma isi faalapotopotoga o le taaloga fusu ina ia faamatagā ma faaleaga ai lona tagata ma lona taumafai i le taaloga.
Ua ia finau ua solia i le faai’uga se tasi o aiaiga o le tulafono o taaloga faipelē faavaomalo ua ta’ua o le 2000 Muhammad Ali Reform Act.
O le faamanatuina o le tuto’atasi o le atunuu i le masina o Iuni o le tausaga nei na tauaao ai e le malo o Samoa le pine taualoa o le Officer of the Order of Samoa e amana’ia ai le alii fusu o Jai Opetaia ona o lana faaeaea i le tapua’iga a le atunuu e ala i le taaloga faipelē.
