E 23 tausaga o se alii o le a tula’i i luma o le Faamasinoga Faaitumalo i Hamilton, e tali i ona moliaga o le faaoomanu’a tugā i ni tagata se to’afā.
Faamauina o lenei matāupu na tula’i mai i le faai’uga o le vaiaso na se’i mavae atu nei.
Ta’ua na tatui e lē ua molia ē ua aafia i se naifi tulou, i Churchill Avenue i Maeroa i le po o le Aso Toona’i.
E to’atasi se tagata na faanatinati ona avatu i le falema’i, talu ai le tugā tele o manu’aga, o le isi to’alua na ogaoga foi aafiaga ae o le to’atasi e faamauina na manu’a mitimiti.
Na logoina leoleo i le matāupu poo le lata i le itula e 9 i le po.
Faamanino e sui o le auaunaga o leoleo, e to’atasi se tagata na mafai ona sola ese mai le nofoaga na tula’i ai lenei faalavelave, e sa’ili fesoasoani i tuaoi.
Ma o lea na ta’ua na iai le tagata i totonu o le fale na faapāina le fana, e le’i iai se isi na aafia mai i lea laaumalosi.
Faamatala e leoleo le telē o le aafiaga o lenei matāupu, ma le tulaga o lagona fefe o le to’atele o tuaoi i le mea ua tupu.
Fautuaina foi le iai pea o leoleo i lenei nofoaga i le faatautaia ai o a latou su’esu’ega.
Puna o Faamatalaga: https://www.rnz.co.nz/news/crime-and-justice/1022033/man-in-court-after-four-people-stabbed-gun-fired-in-hamilton-knife-attack
