E 3 tausaga ua faasala ai i le falepuipui se tamā mai Remuera ua silia ma le 80 tausaga le matua, ina ua ia ioe i moliaga e 15 e faatatau lea i lona umiaina o le lata i le 200,000 o faila o ata pu’e o fanau o loo sauāina, o faiga faasolitulafono e fesoota’i lea i faigā aiga fai faamalosi i fanau.
O faila sa maua i luga o masini eletoroni e 15, ma na faamatalaina e le itu a leoleo, le mata’utia o le tele o ia ata na maua i totonu o nei faila.
Na faailoa i le faamasinoga, e silia ma le 190,000 faila na ia aumaia mai luga o le initaneti, mai i le va o Tesema 2022 ma le masina o Aperila 2023.
Na saunoa le Faamasino o le Faamasinoga Faaitumalo o Aukilani, Andrea Manuel, e leai ni upu faamatala ai le mata’utia ma le anoano o nei ata na maua.
Sa faaaogāina e lea tagata metotia o faiga o fesoota’iga i luga o le initaneti (poo le peer-to-peer file-sharing platform) e tufatufa atu ai faila i isi tagata; ma o ia auala na faateleina ai le salalau atu o ia ata i le to’atele.
Na finau lana loia mo se faasalaga e nofo vaavaaia i le fale poo le home detention, peita’i na teena e le Faamasino lea finauga ma tuu atu le faasalaga o le tolu tausaga i le to’ese.
Faamauina le toe apili ai o le faai’uga a le faamasinoga, ma ua tatala o ia i tua i lalo o ni aiaiga a o faatali le isi iloiloga a le faamasinoga.
E lē o mafai ona faasalalau faalaua’itele le suafa o lenei tagata i le taimi nei.
Puna o Faamatalaga: https://www.nzherald.co.nz/nz/remuera-octogenarian-jailed-after-unprecedented-volume-of-child-abuse-material-uncovered/IKO43N67WFCRNPS3YJDNSWLKKU/
