O le silia ai nei ma le vaiaso talu ona aafia se tasi o vaalele laitiiti o le Samoa Airways i se faalavelave ina ua tulaueleele i le malae vaalele i Fitiuta i le Manu’atele, ua lipotia ai nei le faia o tapenaga a le kamupani vaalele mo le toe aumaia i Apia o lea vaa mo ni galuega e toe faaleleia ai.
Ua toe tatala malaga a vaalele aga’i i le motusā e afea ai Fitiuta ae o loo iai pea le vaalele na aafia i le vaega i autafa o le malae e tulaueleele ma oese ai vaalele, ma o loo faatali ni inisinia e malaga iai mo le siakiina o le vaa ma silasila i vaega o faaletonu.
O loo ta’ua i lipoti o le malosi o savili i le taimi na tulaueleele ai o le māfua’aga lea o le tula’i mai o le faaletonu, ma ua faafetaia ai pailate na faafoeina le vaa i le mata’alia e ui ina sa faamanu’alia se tasi o le pasese o se tagata faigaluega o le kamupanī vaalele sa malaga ai.
E lua isi vaalele laiti twinotter a le Samoa Airways o loo faaauauina le tautua a le kamupani vaalele i le taimi nei a o tālia ai se taimi e toe lele ai le tasi o ona vaa ua faaletonu i le faalavelave na tupu i le Aso Lua o le vaiaso ua mavae.
