Ua toe faamanuiaina Samoa i Taaloga a Malo o le Taupulega ina ua manumalo Seine Stowers i le pine auro i le taaloga o le siisii u’amea mamafa i le vaega o tama’ita’i, 77 kilokalama le mamafa.
Na mafai ona sii e Seine Stowers se matāti’a i le taamilosaga poo le Commonwealth Games record e 107 kilokalama i le sii malele poo le snatch, ma le 130 kilokalama i le sii mālōlō poo le clean and jerk, i le tuufaatasiga e 237 kilokalama le mamafa, lea na tulaga muamua ai lea alo o Samoa, ma manumalo ai i le pine auro.
Na maua e Isabella Brown o Egelani le pine siliva, ae maua e Laura Hughes o Wales le pine apamemea.
I le itupa o alii i lea lava taaloga o le siisii u’amea mamafa, o lea sa tausiniō Emmanuel Shalom Palota Ulimasao i le vaega o alii e 94 kilokalama le mamafa.
I le taaloga o faipelega, na malo ai le sui o Initia Narender Narender ia Michael Seko i le taamilosaga faai’u o le vaega o alii e silia ma le 90 kilokalama.
Na malolo foi Marion Ah Tong i lana taaloga ma le alii Sikotilani i le aupaga o le 70 kilokalama.
Na sa’ili avanoa foi Nu’u Tuilefano mo le togi pulu mamafa a tama’ita’i mo ē e saofagā ma agavaa ai mo taamilosaga pito i luga.
