Ua faailoa i faamaumauga lata mai a le ofisa o numera faamaumauina a le malo le faaauau pea ona faaitiitia aitalafu a le malo o Samoa.
O le faai’uga o le masina o Iuni o le tausaga nei na faai’uina ai le isi o kuata faaletausaga na faamauina ai le faaitiitia i le 690 tesimale 8 miliona tālā o ia aitalafu i le aofa’iga e tusa ma le 19 tesimale 5 pasene o le GDP.
O lona uiga e 8 tesimale 7 miliona tālā le faaitiitiga o ia aitalafu totogi a le malo sa faamauina i le faai’uga o le masina o Iuni 2026 lea na mae’a ai le tausaga faaletupe talu ai.
O se faaitiitiga ua manino ai le maualalo o aitalafu a le atunuu pe a faatusatusa i le aofa’iga sa iai i le faai’uga o le masina o Mati o le tausaga nei lava.
I faamaumauga lava a le ofisa o numela faamaumauina ua faailoa ai e 641 miliona aitalafu o loo togitogi i nisi o faletupe ma faalapotopotoga tau tupe i fafo, ae 49 tesimale 8 miliona le aitalafu a le malo o loo iai nei i le Faalapotopotoga o Mavaega Tausi a Samoa le UTOS.
O kuata e fā faaletausaga ua tuana’i sa faamauina ai e le ofisa o numela faamaumauina le alu pea i lalo o le aofa’iga o aitalafu a le malo ma e lē o toe iai nisi nonōgatupe.
