E lua faai’uga a le Faamasinoga Maualuga na faamaonia ai moliaga o solitulafono tau faiaiga, faaoolima matagā ma le toso teine, o le a iloilo i taualumaga a le Faamasinoga o Talosaga Toe Iloilo a le Faamasinoga Maualuga i le masina fou o Setema.
O le matāupu tau faamasinoga faasaga ia Petaia Setu ma Mase Mahonri Schwalger e le’i lauina ni faasalaga ona sa silasila le Faamasinoga Maualuga i talosaga o le taofia o le lauina o se faai’uga i se faasalaga ae ave muamua e iloilo finauga o loo fesiligia ai le faamaonia o moliaga e le Faamasinoga o Talosaga Apili.
Ua teena le taofia o le lauina o se faasalaga ae ua tuuina atu e iloilo e lea faamasinoga talosaga apili, peita’i afai ae lē faaauauina ia talosaga apili ona o nisi māfua’aga, ona toe fofogaina lea e le Faamasinoga Maualuga ia matāupu e faatulaga ai se aso e lau ai ni faasalaga.
O le aso 7 o Setema e amata ai ona tauaofia galuega a le Faamasinoga o Talosaga Apili lea e tauaveina e Faamasino mai fafo, ma o le tauaofiaga mulimuli foi lea a lea faamasinoga mo lenei tausaga.
