O le Aso Tofi o lenei vaiaso ua faatalanoa ai i Samoa le lumana’i o le fuafuaga o se fesoasoani tupe e 150 miliona tālā mai le malo o Ausetalia mo polokalame e atina’e ai le taaloga lakapi i le Pasefika, ae faapitoa i le atina’e o lea taaloga i atunuu o Tonga, Fiti, ma Samoa.
O lea fuafuaga ua faaigoaina o le Vaimoana rugby proposal ma o le a aofia ai sui o iuni lakapi a atunuu e to’atolu i talanoaga ma sui o le pulega o le lakapi a le lalolagi ma ua talimalo ai le Lakapi Samoa.
Ua faailoa e se molimau o loo fuafua a talia uma e atunuu e tolu le fuafuaga faatasi ai ma le lagolago a le lakapi o le lalolagi le World Rugby, ona tuuina atu lea i le malo o Ausetalia mo sana faai’uga pe talia.
Afai ae maua lea fesoasoani ua faaalia e le molimau o le a maua e Fiti, Tonga ma Samoa ni vaegatupe e atina’e ai le lakapi ma o se faai’uga sa iai le fuafuaga e tuuina atu i le tausaga na te’a nei, peita’i ona sa tuai ona saini e Samoa le fuafuaga poo le proposal o le māfua’aga lea ua tuai ai ona tuuina atu ia Ausetalia le fuafuaga poo le proposal.
O le Aso Tofi ma le Aso Faraile o le vaiaso nei e faagasolo ai faatalanoaga o lea fuafuaga.
