Ua lē talia le talosaga a Joe Perez sa finauina e se loia sa tula’i mo lea tama lakapi, ina ia faapafala se faasala e aunoa ma le faamaonia o lona moliaga o le umia o se meafaitino o se straw e faaaogā i fuālaau faasāina.
Ua faamaonia ai lona moliaga ae ua lē talafeagai se faasalaga faafalepuipui mo ia, ae ua nofo vaavaaia mo le 12 masina ma auai i polokalame o le ola toe fuata’ina.
O le faai’uga a le tama’ita’i faamasino sinia o le Faamasinoga Faaitumalo le afioga Talasa Atoa Saaga, ua momoli atu ai se fe’au tāua i lea alo lauiloa o le atunuu i le lakapi, i lona faatāua o lona tulaga o ia o se avefu’a poo se amepasa o Samoa i le lalolagi i le taaloga lakapi aemaise mo tupulaga talavou ia fai ma faata’ita’iga lelei mo isi tupulaga o le atunuu ma ia ‘alo’alosā ma lē toe aafia i ni solitulafono aemaise o fuālaau faasāina.
O Iuni o le tausaga nei i se osofa’iga a leoleo i Vaigaga na taofia ai Joe Perez ma nisi sa molia i solitulafono e fesoota’i i le umia o nakoti poo fuālaau faasāina.
Ua faatonuina Joe ia auai i polokalame a le autalavou a le ekalesia EFKS i lo latou nuu ma ia lotolotoi foi i mafutaga o tupulaga talavou e tetee atu i le faaaogāina o nakoti.
E molia lea tama lakapi o loo ta’alo i se kalapu i Romania lea e mae’a ia Fepuari o le tausaga fou lana konekarate.
