A o tau faai’ui’u le sa’ili’iliga a sui o le auaunaga faavaomalo o loo faatāua ai faiga faatemokarasi i faigāpalota, i le aoao manogi i finagalo o ta’ita’i faalemalo, o nisi o matāgaluega a le malo, ma faalapotopotoga tuma’oti, i le faaaogāina o fesoota’iga faatekonolosi e palota mai ai i fafo tagatānuu o Samoa, ua faailoa e se ofisa sinia o le ofisa o le komisi o faigāpalota o se loia foi, e taga eseese ma felanulanua’i lagona faaalia i lea fuafuaga.
O nisi e lagolagoina ae iai ma le tele o fesili e mulimuli mai ai pe o se faiga e lē tula’i mai ai nisi faafitauli, ae o nisi latou te fautuaina le faataatia i se isi taimi ae faaaogā pea le tulaga o loo iai nei, o le malaga mai i Samoa e lesitala ma palota ai.
Le tama’ita’i loia o se ofisa sinia o le ofisa o le komisi o faigāpalota le tofa Mulitalo Mauga Fetogi Vaai.
O le Aso Faraile o le vaiaso nei e mae’a ai le sa’ili’iliga o loo faia ma le faamoemoe o le taunuuga o lea galuega o le tuuina atu i se vaega galulue poo se taskforce a le malo ua aofia ai nisi o matāgaluega a le malo latou te soalaupuleina ma iloilo ona tuuina atu lea o se fautuaga i le Kapeneta i se taimi o le a mae’a ai.
