O le asiasiga a le alii Peresetene o Lusia o Vladimir Putin i Kuril Islands o se motu e faatonutonu e Moscow i le Pasefika ae o loo finau ane foi iai Iapani, ua alia’e ai ma ni tetee i le faimalaga atu o le alii Peresetene.
Lipotia e le CNN i le asō na asia muamua e Putin se falema’i, falei’a ma se a’oga i le motu ma talanoa foi i tagatānuu.
Ta’ua i le lipoti o le itu i Saute o le motu o loo finau ane Iapani o latou o loo iai aiā tatau i lea faaitu lea e faaigoa o le Northern Territories.
Fai mai na aveesea e le Soviet Union ia motu mai ia Iapani i aso faai’u o le Taua Lona Lua a le Lalolagi ma e le’i toe iai lava se maliega o se filemu i le va o atunuu e 2 talu mai lea taimi.
Ua faailoa la e le Minisita o le Va i Fafo a Iapani o Toshimitsu Motegi e matuā tetee lo latou atunuu i le malaga ane o Putin i le motu ma sa ia fe’au ai foi le amepasa o Lusia i le ofisa i Tokyo e faailoa iai lona tetee.
Ua ta’ua foi i le lipoti se tali ane a le ofisa o Lusia i Tokyo i faaseā ia e faapea ua malamalama o le itu i Saute o Kuril Islands o se vaega o Lusia ma o le faimalaga ane o Putin o faai’uga ua faia e ona ta’ita’i e lē avanoa ona faatalanoa ma isi setete mai fafo.
Faailoa foi se finagalo o le Palemia o Iapani, Sanae Takaichi i le matāupu lea e faapea e na te lē taliaina lea asiasiga a Putin ma ua toe faaopoopo atu foi lea mafatiaga i le tulaga lē lelei o loo iai sootaga o atunuu e lua ona o le matāupu ia Ukraine.
Puna o Faamatalaga: https://edition.cnn.com/2026/08/13/asia/putin-kuril-islands-japan-intl
