Ua mae’a Taaloga a Malo o le Taupulega sa tausiniō ai Samoa i lenei tausaga ma ua manumalo ai i le lua pine; e tasi le auro tasi le pine siliva.
O taaloga siisii u’amea mamafa na maua ai pine a Samoa lea na manumalo le tama’ita’i o Seine Stowers le auro ae o le alii o John Tafi le pine siliva.
I le faatulagaina o atunuu ma pine na latou maua, o Samoa ua saofa’i i le tulaga 17 mai atunuu e 36 na tausiniō, ae tulaga 3 i le faatulagaina o ‘au mai atunuu o le Pasefika.
O Taaloga a Malo o le Taupulega na faia i Birmingham i Peletania i le tausaga e 2022 e lima pine na manumalo ai Samoa lea e tasi le auro ae fā siliva ma sa saofa’i ai i le tulaga 19.
O le taumafaiga a le ‘au masii a Samoa i ia taaloga faavaomalo i le masina na te’a nei ua ausia ai e Samoa se isi tulaga maualuga i le filifilia o le afioga Tuaopepe Jerry Wallwork o loo faauluulu iai taaloga siisii u’amea mamafa a le atunuu e avea ma Pelesetene o lea taaloga mo atunuu o Malo o le Taupulega le Commonwealth Weightlifting Federation.
