Ua faailoa mai nei le amata faatino ai o galuega māta’itū a le vaega o le vaaitau mo nisi o faaitu o Northland ma Aukilani i tulaga o le ono tetele mai o timuga, ma e ono mamafa mai timuga i le asō.
Faamauina i ripoti mai le NZ Herald, na amata mai ona faatulaga galuega māta’itū mo le 15 itula mai le itula e 11 i le taeao analeila, mo le itu i Mātū ma le itu i Sasa’e o Northland ma Aukilani, o le itu i Mātū o Ōrewa, e aofia ai ma Great Barrier Island.
Faamanino mai e le sui o le MetService, Ashlee Parkes, o loo aga’i mai savili mai le itu i Sisifo, ma o le a aumaia ai timuga i le tele o vaega o le itu i Mātū ma Sisifo.
Na maitauina foi le mamafa mai o timuga i Northland ma le itu i Mātū o Aukilani mai le taeao analeila se’ia pā’ia mai le aoauli, ae o loo faamauina le ono faaitiitia i le aga’i atu i le afiafi.
Ua fautuaina tagata ina ia faaeteete i le aga’i atu ai i luga o auala, aemaise lava i le mamafa mai o timuga, e ono lē saogalemū ai mo feoa’iga ma le maseesee o auala.
O loo ta’ua foi, o faaitu o Westland ma Fiordland o loo faamauina aafia i timuga mamafa.
Puna o Faamatalaga: https://www.nzherald.co.nz/nz/weather-heavy-rain-downpours-forecast-for-northland-and-auckland
