Ua faailoa e le pulega o le tineimū ma galuega lavea’i i taimi o faalavelave faafuase’i i lenei vaiaso le mae’a i le manuia o galuega sa titina ai ni mū o le togavao i Samalaeulu ma Falealupo i Savaii, ma aumai ai se fautuaga malosi i le atunuu i le faaeteete i le faia o tafuna’i ma galuega o le tāina o fanua mo faato’aga ae susunu ai ma le vaomatua.
O le aso 8 o Aokuso na ulua’i lipotia ai le mū o le togavao i Samalaeulu ae na toe tupu i le aso 15 le Aso Toona’i ua mavae.
O le mū i Falealupo na galulue ai le vaega o le tineimū i Asau ae sa auina atu nisi o le aufaigaluega i Upolu e fesoasoani iai.
Ua faailoa e le ofisa o le vaaitau le tulaga malosi o mūgala ma le faaitiitia o timu e maua lea ua faamauina le faaauau pea o lea tulaga mai le masina lenei e oo atu i le masina amata o le tausaga fou.
O uiga o le tau ua faaigoaina o le EleNino o loo māfua ai ia tulaga ua aliali mai ma o le fautuaga foi lea a le ofisa vaaitau i lo tatou atunuu o le aputiputi ma teu lelei le suāvai maua pe a maua nai timu.
E ui o le EleNino e aumai uiga matutū o le tau e pei ona aafia ai Samoa peita’i ua faailoa e le vaaitau e maualuga ai ma le avanoa e ono aafia ai le atunuu i se matagi afā matuiā, ma o le vaai mamao foi lea mo le vaitau o timuga ma afā o le tausaga 2026 i le 2027.
Comments
Loading comments…