O le faaaogāina e le Fono Faavae a le itumalo palota o Faleata 2 o tupe o le 1.8 miliona mo le atina’e o nuu ma afio’aga, ua faaalia e le malo, o loo mulimulita’ia ai ta’iala ma faiga faavae o le poloketi miliona, aemaise o le tulafono o le faaaogāina o tupe a le malo.
O le tasi lea o itumalo ua faailoa i le faasalalauga o loo gasolo atu pea nisi tagata ma i latou ua foi mai galuega faavaitaimi e tapa le faamanuiaga e 150 tālā o le fesoasoani o le toe a’e o a’oga lea na faamuta i le faai’uga o le masina o Iuni.
Peita’i o se tasi lea o itumalo e pito to’atele le faitauaofa’i o ona tagata e 9 afe 769 ma ua faaaluina ai le tasi le miliona 465 afe ma le 3 selau 50 tālā i le fesoasoani o le 150 tālā.
O isi tupe mai le tasi tesimale valu miliona sa faaalu i isi atina’e sa pasia e le komiti o le Fono Faavae, e pei o le teuteu faamatagofie o nisi o nuu ma afio’aga mo le faamanatuina o le Tuto’atasi ia Iuni, ae o loo totoe ai se isi tupe i le tusitupe a le Fono Faavae.
O le faailoa ai e le malo o le faaaogāina o tupe o le tasi tesimale valu miliona a Faleata 2, ona o se lipoti na agiga ai tupe sa tala i tua e le ta’ita’ifono o le Fono Faavae a lea itumalo.
O loo tālia nei e lea Fono Faavae le faamatuuina atu o vaegatupe o le 2 miliona ua pasia i le tala autū o le tupe mo le tausaga faaletupe fou o loo faagasolo.
Ae mo le silafia e faalagolago le faamatuuina o vaegātupe o le lua miliona mo Fono Faavae a itumalo uma pe a faamalieina lipoti o le faaaogāina o le tufatufaga e tasi tesimale 8 miliona tālā.
